CHOR UVRIU DANIS-TAVANASA

Il Chor Uvriu Danis-Tavanasa ei vegnius fundaus igl onn 2006 entras la fusiun dil Chor baselgia e dil Chor mischedau Danis-Tavanasa. Per saver mantener vinavon ils usits ed ademplir las obligaziuns culturalas sco era ecclesiasticas en nies vitg, ein ils dus chors sedecidi da seunir tiel chor Uvriu Danis-Tavanasa. Il num "uvriu" deriva digl uaul da ruvers che sesanfla al cunfin dil vitg da Danis. Da quei gener ei quei igl uaul situaus il pli ad ault ell'entira Europa. Dil reminent posseda il chor Uvriu in agen ruveret ed observa loschamein co el crescha onn per onn.

Schegie ch'il chor Uvriu ei aunc buc aschi vegls, ha el gia astgau participar a pliras fiastas da cant e sepresentar a caschun da plirs concerts. In punct culminont ei franc stada l'ediziun dil disc cumpact cun varga 20 canzuns egl onn 2013 staus.

Dapi sia entschatta stat il chor - che conta canzuns da tuts geners - sut la bitgetta dil dirigent indigen Daniel Pally. Il chor embellescha buca mo las fiastas baselgia, el conta era a caschun da scadina sepultura el vitg. Il chor Uvriu dumbra actualmein 25 commembers/ras che s'engaschan cun plascher ed anim pil prosperar dil giuven chor.